Azaroaren 17an, Donostiako Udal Liburutegian Arantxa Iturbe kazetariaren Kontu-jaten liburua aurkeztu zen. Obra hau Tolosa 750 Fundazioak enkargatutako Esperientziak proiektuan oinarrituta dago. Gogora dezagun proiektu horren helburua XX. mendeko memoria historikoa berreskuratzea dela hainbat eta hainbat pertsona helduei egindako elkarrizketen bitartez. Alberdaniak argitaratutako liburu honetan hirurogehita hamar urtetik gorako emakume elkarrizketatuen testigantzak jasotzen dira.

Eskarmentu handiko emakumeak dira. Tolosaldeko emakume adin batekoak. Kamera baten aurrean jarri ditu kazetariak. Ez, ez daude ohituta kamerari erantzuten. “Baina zer jakin nahi duzu?”, galdetu dute maiz. Haurtzaroa eta gaztaroa nolakoa izan zuten jakin nahi du kazetariak. Eta kontatu egin dute. Kazetariak idazleari pasatu dio grabazioa, eta idazleak haiena jaso, eta bere uztatik erantsi du zerbait.

Helduek, mahaian eserita, hizketan ari direla, haurren bat adi-adi sumatzen badute, esan ohi dute: “ari zara ba orain ere kontu-jaten”. Arantxa Iturbek berarekin batera jarri gaitu mahai honetan, gure herriko emakume eskarmentudunen mahaian, kontu-jaten.

Arantxa Iturbe Maiz (Alegia, 1964). Kazetaritza ikasi zuen Nafarroako Unibertsitatean. Gaur egun, Euskadi Irratian lan egiten du eta Tolosan bizi da. Bi ipuin-bilduma idatzi ditu orain arte: Ezer baino lehen (1992) eta Lehenago zen berandu (1995). 1999an, Ai, Ama! saiakera argitaratu zuen, antzerkirako egokitu zuena urte batzuk geroago. Horiez gain, haurrentzako ipuinak, irrati-nobelak, eta egunkari-artikuluak idatzi ditu.