Fundazioaren helburuak, estatutoetan jasotzen direnak hain zuzen, ondorengo gaien garapenean labur daitezke:

• Herriaren historia berreskuratzeko ekimenak, Tolosaren sorrera eta bilakaera historikoari buruzko ezagupen hobea izan dezagun.
  
  
• Herrian finkatuta dauden jarduera eta ekimenei laguntza eta babes berezia ematea, bultzada berri bat eta hedapen handiagoa izan dezaten.
  
  
• Tolosako hiriari sona eta kohesioa emango lizkioketen jarduera bereziak antolatzea edo garatzea.
  
  
• 750. urteurrenagatik Tolosa herriaren legatu historikoa bultzatzea eta datozen urteei begira, ospakizuna dela eta sortuko diren energia eta baliabideak garatzea.
  
  

Une hauetan Tolosako eragile guztiak tartean sartu eta beraien parte hartzea lortzea da Fundazioaren lehentasuna, erakunde publikoak eta gainontzeko elkarteek beraien ekarpenak egin ditzaten, eboluzio prozesu zabal baten bilakaeran parte hartuz.

Horretarako lan-mahaiak antolatu dira arloka, eta gai guztiak aztertuko dituzte hamabosteroko bileretan. Aldi berean, lan-mahai hauetatik sortuko da programazio proposamena, lehen aipatutako elkarte eta erakundeekin elkarlanean gauzatuko dena, lehendik mahai-gainean dauden proposamenetan oinarrituta, edo ideia berriak sortuz.

Arlo bakoitzak berea ez den besteengan eragin ditzakeen proposamen eta berrikuntzak izango dira prozesuaren ardatz, egitarau eta ekimenen garapena planifikatu eta antolatzeko era alda dezaketenak hain zuzen.